లష్కర్ బోనాల సందర్భంగా ఉజ్జయిని మహంకాళి రంగం.. భవిష్యవాణిలో కీలక హెచ్చరికలు

సికింద్రాబాద్ ఉజ్జయిని మహంకాళి బోనాల ఉత్సవాల్లో భాగంగా సోమవారం ఉదయం సంప్రదాయబద్ధంగా నిర్వహించిన రంగం కార్యక్రమం భక్తులను ఆకట్టుకుంది. ఉదయం 9.55 గంటలకు మాతంగి స్వర్ణలత మట్టి కుండపై నిలబడి అమ్మవారిని ఆవాహన చేసి భవిష్యవాణి వినిపించారు.

ఈ సందర్భంగా అమ్మవారు ఆగ్రహంతో ఉన్నారని, భక్తులు కేవలం ప్రశ్నలు అడగడం కాకుండా అమ్మవారి సూచనలు, మాటలను పాటించాలని భవిష్యవాణిలో పేర్కొన్నట్లు సమాచారం.

భారీ వర్షాలు, వరదలపై హెచ్చరిక

రానున్న కాలంలో భారీ వర్షాలు, కుంభవృష్టి, వరదలు సంభవించే అవకాశం ఉందని, వీటి కారణంగా ప్రాణనష్టం జరిగే ప్రమాదం ఉందని భవిష్యవాణిలో హెచ్చరించినట్లు తెలిపారు. అలాగే అగ్ని ప్రమాదాల విషయంలోనూ ప్రజలు అప్రమత్తంగా ఉండాలని సూచించినట్లు పేర్కొన్నారు.

ఆరు నెలల్లో అమ్మవారి విగ్రహ ప్రతిష్ఠ

గతంలో ఇచ్చిన హామీ మేరకు అమ్మవారి విగ్రహ ప్రతిష్ఠ ఆలస్యం కావడంపై అసంతృప్తి వ్యక్తమైనట్లు తెలిపారు. ఆరు నెలల్లోగా విగ్రహ ప్రతిష్ఠ పూర్తి చేయాలని, లేకపోతే పరిసర ప్రాంతాల్లో తీవ్ర ప్రాణనష్టం సంభవించే అవకాశం ఉందని హెచ్చరించినట్లు సమాచారం. విగ్రహ ప్రతిష్ఠ పూర్తయితే భక్తుల కోరికలు నెరవేరుతాయని పేర్కొన్నట్లు తెలిపారు.

సామాజిక విలువలపై ఆవేదన

సమాజంలో నైతిక విలువలు తగ్గిపోవడం, బాధ్యతలను విస్మరించడం, సంప్రదాయాలను నిర్లక్ష్యం చేయడం, పిల్లలను సరైన క్రమశిక్షణతో పెంచకపోవడం వంటి అంశాలపై కూడా భవిష్యవాణిలో ఆవేదన వ్యక్తమైనట్లు సమాచారం.

గమనిక: రంగం కార్యక్రమంలో వెలువడిన భవిష్యవాణి విశ్వాసాలు, ఆధ్యాత్మిక సంప్రదాయాలకు సంబంధించినవి.