టీటీడీ ఆధ్వర్యంలోని కార్వేటినగరం శ్రీ రుక్మిణీ–సత్యభామ సమేత శ్రీ వేణుగోపాలస్వామివారి ఆలయంలో ఆగస్టు 25 నుంచి 27వ తేదీ వరకు వార్షిక తెప్పోత్సవాలు వైభవంగా నిర్వహించనున్నట్లు టీటీడీ ప్రకటించింది.
మూడు రోజుల పాటు జరిగే ఈ దివ్యోత్సవాల్లో ఆగస్టు 25న శ్రీ సీతా–లక్ష్మణ సమేత శ్రీ కోదండరామస్వామివారు, ఆగస్టు 26, 27 తేదీల్లో శ్రీ రుక్మిణీ, సత్యభామ సమేత శ్రీ వేణుగోపాలస్వామివారు పుష్కరిణిలో సుందరంగా అలంకరించిన తెప్పపై విహరిస్తూ భక్తులకు దివ్య దర్శనమివ్వనున్నారు. ప్రతిరోజూ రాత్రి 7.30 గంటల నుంచి 8.30 గంటల వరకు తెప్పోత్సవం నిర్వహించబడుతుంది.
ఉత్సవాల్లో భాగంగా ప్రతిరోజూ ఉదయం 9 నుంచి 10 గంటల వరకు స్నపన తిరుమంజనం, సాయంత్రం 5.30 నుంచి రాత్రి 7.30 గంటల వరకు తిరువీధి ఉత్సవం శాస్త్రోక్తంగా నిర్వహిస్తారు.
అంతేకాకుండా, టీటీడీ హిందూ ధర్మప్రచార పరిషత్ మరియు అన్నమాచార్య ప్రాజెక్టు ఆధ్వర్యంలో ఆధ్యాత్మిక ప్రవచనాలు, భక్తి సంగీత కార్యక్రమాలు నిర్వహించి భక్తులకు ఆధ్యాత్మిక అనుభూతిని కలిగించనున్నారు.
ఈ సందర్భంగా అధిక సంఖ్యలో భక్తులు పాల్గొని శ్రీ వేణుగోపాలస్వామివారి దివ్య కృపకు పాత్రులు కావాలని టీటీడీ ఆహ్వానించింది.