గణపతి హోమంతో ఉత్సవాలకు శ్రీకారం.. నవంబర్ 12, 13 తేదీల్లో సుబ్రహ్మణ్యస్వామివారి హోమం
తిరుపతి: కార్తీక మాసాన్ని పురస్కరించుకుని తిరుపతిలోని శ్రీ కపిలేశ్వరస్వామివారి ఆలయంలో నెల రోజుల పాటు నిర్వహించనున్న విశేషపూజ హోమ మహోత్సవాలు నవంబర్ 11, బుధవారం భక్తిశ్రద్ధలతో ప్రారంభమయ్యాయి. తొలిరోజు గణపతి హోమాన్ని శాస్త్రోక్తంగా నిర్వహించారు.
ఈ సందర్భంగా ఉదయం పంచమూర్తులకు పాలు, పెరుగు, తేనె, చందనం, విభూతితో విశేష స్నపన తిరుమంజనం నిర్వహించారు.
సాయంత్రం గణపతి పూజ, పుణ్యాహవచనం, వాస్తు పూజ, పర్యగ్నీకరణం, మృత్సంగ్రహణం, అంకురార్పణ, కలశస్థాపన, అగ్నిప్రతిష్ఠ కార్యక్రమాలు చేపట్టారు. అనంతరం గణపతి హోమం, లఘుపూర్ణాహుతి నిర్వహించారు.
విఘ్నవినాయకుడి అనుగ్రహంతో ఆటంకాలు తొలగి, చేపట్టిన పనులు విజయవంతం కావాలనే సంకల్పంతో ఈ హోమం నిర్వహించారు.
నవంబర్ 12, 13 తేదీల్లో సుబ్రహ్మణ్యస్వామివారి హోమం
నెల రోజుల విశేషపూజ హోమ మహోత్సవాల్లో భాగంగా నవంబర్ 12, 13 తేదీల్లో శ్రీ సుబ్రహ్మణ్యస్వామివారి హోమాన్ని వైభవంగా నిర్వహించనున్నారు.
ఈ కార్యక్రమంలో ఆలయ డిప్యూటీ ఈవో నాగరత్న, ఏఈవో కుమారి దేవి, సూపరింటెండెంట్ చంద్రశేఖర్, ఆలయ అర్చకులు, పెద్ద సంఖ్యలో భక్తులు పాల్గొన్నారు.

