తిరుమలలో వైభవంగా శ్రీవారి బ్రహ్మోత్సవాల అంకురార్పణ

సెప్టెంబర్ 15 నుంచి 23వ తేదీ వరకు జరగనున్న శ్రీవారి సాలకట్ల బ్రహ్మోత్సవాలకు సోమవారం సాయంత్రం శాస్త్రోక్తంగా అంకురార్పణ నిర్వహించారు. వైఖానస ఆగమ పద్ధతిలో జరిగిన ఈ కార్యక్రమంతో బ్రహ్మోత్సవాలకు అధికారికంగా శ్రీకారం చుట్టారు.

విశ్వక్సేనులవారి ఊరేగింపు

అంకురార్పణలో భాగంగా శ్రీవారి సేనాధిపతి శ్రీ విష్వక్సేనులవారు ఆలయంలోని నాలుగు మాడ వీధుల్లో ఊరేగుతూ బ్రహ్మోత్సవాల ఏర్పాట్లను పర్యవేక్షించారు. అనంతరం యాగశాలలో భూమాతకు ప్రత్యేక పూజలు నిర్వహించి పుట్టమన్నులో నవధాన్యాలను నాటారు.

అన్ని విభాగాల్లో 30 శాతం అదనపు ఏర్పాట్లు

టీటీడీ ఈవో శ్రీ ముద్దాడ రవిచంద్ర మాట్లాడుతూ బ్రహ్మోత్సవాలకు అన్ని ఏర్పాట్లు పూర్తయ్యాయని, ఈసారి అన్ని విభాగాల్లో 30 శాతం అదనంగా ఏర్పాట్లు చేసినట్లు తెలిపారు.

గరుడసేవ రోజున అన్నప్రసాదాలను 38 శాతం అదనంగా, ఆలయంలో స్వామివారి ప్రసాదాలను 30 శాతం అదనంగా అందుబాటులో ఉంచనున్నట్లు చెప్పారు. టీ, కాఫీ, పాలు, మజ్జిగ వంటి పానీయాలను 50 శాతం అదనంగా సిద్ధం చేయనున్నారు.

భక్తుల రవాణా కోసం ఆర్టీసీ బస్సులకు 500 అదనపు ట్రిప్పులు పెంచి మొత్తం 3,100 ట్రిప్పులు నడిపేలా ఏర్పాట్లు చేసినట్లు ఈవో తెలిపారు.

మంగళవారం ధ్వజారోహణం

సెప్టెంబర్ 15న సాయంత్రం 6:21 నుంచి 6:35 గంటల మధ్య మీనలగ్నంలో ధ్వజారోహణం నిర్వహించనున్నారు. బ్రహ్మోత్సవాల ప్రారంభం సందర్భంగా ముఖ్యమంత్రి నారా చంద్రబాబు నాయుడు రాష్ట్ర ప్రభుత్వం తరఫున శ్రీవారికి పట్టు వస్త్రాలు సమర్పించనున్నారు.

సెప్టెంబర్ 16న తిరుమల వైకుంఠ క్యూ కాంప్లెక్స్-1లో ఏర్పాటు చేసిన పిల్గ్రిమ్ ఎక్స్‌పీరియన్స్ సెంటర్, ఎస్వీ మ్యూజియం, ఎలక్ట్రిక్ బస్సులు, నందకం యాప్, భక్తుల గ్రూప్ ఇన్సూరెన్స్ పథకాలను ప్రారంభించనున్నారు.

అంకురార్పణకు ప్రత్యేక ప్రాధాన్యం

వైఖానస ఆగమంలో అంకురార్పణకు విశేష ప్రాధాన్యం ఉంది. ఉత్సవాలు విజయవంతంగా జరగాలని సంకల్పిస్తూ భూమాతను ప్రార్థించి పవిత్ర విత్తనాలను పాలికల్లో నాటే కార్యక్రమమే అంకురార్పణ.

సూర్యాస్తమయం తర్వాత శుభ ముహూర్తంలో ఈ కార్యక్రమాన్ని నిర్వహించడం ఆనవాయితీ. యాగశాలలో పాలికలను మట్టితో నింపి, వేదమంత్రాల మధ్య విత్తనాలను నాటి నీరు పోస్తారు. అనంతరం వివిధ మంత్రాలు, విష్ణుసూక్తం పఠిస్తూ ప్రతిరోజూ పాలికలకు నీరు అందిస్తారు.

ఈ కార్యక్రమంలో తిరుమల శ్రీశ్రీశ్రీ పెద్దజీయర్ స్వామి, శ్రీశ్రీశ్రీ చిన్నజీయర్ స్వామి, అదనపు ఈవో సి.హెచ్. వెంకయ్య చౌదరి, శ్రీవారి ఆలయ డిప్యూటీ ఈవో భాస్కర్, ఇతర అధికారులు పాల్గొన్నారు.