గజవాహన సేవలో దేశ, విదేశీ కళాకారుల సందడి.. 528 మంది ప్రదర్శనలు

 శ్రీవారి సాలకట్ల బ్రహ్మోత్సవాల్లో భాగంగా ఆరవ రోజు ఆదివారం సాయంత్రం జరిగిన గజవాహన సేవలో దేశ, విదేశాలకు చెందిన కళాకారులు తమ ప్రదర్శనలతో భక్తులను ఆకట్టుకున్నారు. వివిధ రాష్ట్రాలు, జర్మనీకి చెందిన 19 కళాబృందాల్లోని 528 మంది కళాకారులు పాల్గొని తిరుమాడ వీధుల్లో సాంస్కృతిక వైభవాన్ని చాటారు.

జర్మనీ కళాకారుల లక్ష్మీనృసింహ నృత్యం ప్రత్యేక ఆకర్షణ

జర్మనీకి చెందిన కళాబృందం ప్రదర్శించిన లక్ష్మీనృసింహ నృత్యం ప్రత్యేక ఆకర్షణగా నిలిచింది. జర్మనీలో నివసిస్తున్న భారతీయులు ఈ నృత్యాన్ని ప్రదర్శిస్తూ భారతీయ సంస్కృతి, సంప్రదాయ కళలపై తమకున్న అభిమానం, భక్తిని చాటారు. భక్తులు ఈ ప్రదర్శనను ఆసక్తిగా తిలకించారు.

వివిధ రాష్ట్రాల సంప్రదాయ కళారూపాలు

ఆంధ్రప్రదేశ్, అస్సాం, అరుణాచల్ ప్రదేశ్, కర్ణాటక, మహారాష్ట్రతో పాటు జర్మనీ నుంచి కళాకారులు పాల్గొన్నారు. ఆయా ప్రాంతాల జానపద, శాస్త్రీయ కళారూపాలను ప్రదర్శించారు.

ఆంధ్రప్రదేశ్ కళాకారులు శ్రీనివాస కల్యాణం, భరతనాట్యం, కోలాటం ప్రదర్శించగా.. అస్సాం కళాకారులు తమ సంప్రదాయ కళారూపాలతో ఆకట్టుకున్నారు. అరుణాచల్ ప్రదేశ్ కళాకారులు గాలో కళారూపాన్ని ప్రదర్శించారు.

కర్ణాటక కళాకారులు కథక్, శ్రీ వేంకటేశ్వర వైభవం, యక్షగానం, అర్ధనారీశ్వర పార్వతి శివ కల్యాణం, జగన్నాథాయ జగన్నాటకం, మూర నృత్యం, కుణిత భజన, కోలాటం తదితర ప్రదర్శనలు ఇచ్చారు. మహారాష్ట్ర కళాకారులు డ్రమ్స్, లెజుమ్ ప్రదర్శనలతో ఉత్సాహాన్ని నింపగా.. పాండిచ్చేరి కళాకారులు కరగట్టం ప్రదర్శించారు.

కళామయంగా మారిన తిరుమాడ వీధులు

జానపద, శాస్త్రీయ కళల సమ్మేళనంగా సాగిన ఈ ప్రదర్శనలతో తిరుమాడ వీధులు కళామయంగా మారాయి. నృత్యాలు, వాయిద్య ప్రదర్శనలు, సంప్రదాయ కళారూపాలను భక్తులు ఆసక్తిగా వీక్షించారు.

దేశంలోని వివిధ ప్రాంతాలతో పాటు విదేశాల నుంచి కళాకారులు పాల్గొనడంతో శ్రీవారి బ్రహ్మోత్సవాల్లో ఆధ్యాత్మిక వైభవంతో పాటు భారతీయ సంస్కృతి, సంప్రదాయాల వైవిధ్యం ప్రతిబింబించింది.