సృష్టి లయకారకుడైన పరమశివుడిని ఆరాధించడం సకల శుభ ప్రదమని భక్తుల విశ్వాసం. శివుడి నిరాకార, సాకార తత్వానికి ప్రతీకగా భావించే శివలింగాన్ని ఇంట్లో పూజా మందిరంలో ఉంచి నిత్యం అర్చించవచ్చా లేదా అనే సందేహం చాలామందిలో కలుగు తుంటుంది. శాస్త్రం ప్రకారం గృహంలో శివలింగాన్ని ప్రతిష్ఠించి పూజించవచ్చు. అయితే, అందుకు కొన్ని నిర్దిష్ట నియమాలు, పద్ధతులు పాటించడం ఎంతో ఆవశ్యకమని ఆధ్యాత్మిక వేత్తలు సూచిస్తున్నారు.
చిన్న పరిమాణంలోనే శివలింగం..
ఆలయాలలో ఉండే భారీ లింగాల మాదిరిగా కాకుండా, ఇంట్లో ఉంచే శివలింగం పరిమాణం చాలా చిన్నదిగా ఉండాలని శాస్త్ర వచనం. సాధారణంగా బొటనవేలి పరిమాణానికి మించని శివలింగాన్ని ఇంట్లో ఉంచుకోవడం శ్రేయస్కరం. నర్మదా నదిలో లభించే బాణలింగాలు లేదా స్ఫటిక, లోహపు లింగాలను పూజా మందిరంలో ఉంచి ఆరాధించడం శుభ ఫలితాలను ఇస్తుందని విశ్వసిస్తారు.
నిత్య అభిషేకం.. శుద్ధ జల సమర్పణ
శివుడు 'అభిషేక ప్రియుడు'. ఇంట్లో శివలింగాన్ని ప్రతిష్ఠిస్తే నిత్యం శ్రద్ధాభక్తులతో జలాభిషేకం చేయడం తప్పనిసరి. గృహంలో ఉంచిన లింగాన్ని నిర్లక్ష్యం చేయకూడదు. నిష్టతో నిత్య పూజ, నైవేద్యం, దీపారాధన నిర్వహించాలి. క్రమం తప్పకుండా జలాభిషేకం నిర్వహించడం వల్ల గృహంలో ప్రతికూల శక్తులు తొలగి, ప్రశాంతత నెలకొంటుందని విశ్వసిస్తారు.
మారేడు దళాల విశిష్టత
శివపూజలో మారేడు దళాలు అత్యంత ప్రధానమైనవి. ‘త్రిదళం త్రిగుణాకారం త్రినేత్రం చ త్రియాయుషం’ అంటూ భోళాశంకరుడికి మారేడు దళాలను సమర్పించడం వల్ల కోటి జన్మల పాపాలు హరిస్తాయని పురాణాలు చెబుతున్నాయి. ముఖ్యంగా శ్రావణ మాసం, మహాశివరాత్రి, కార్తిక మాసాలలో స్వామివారికి బిల్వార్చన, క్షీరాభిషేకాలు విశేష ఫలితాలనిస్తాయి.
సోమవారం పూజలు.. ఫలితాలు
వారంలో సోమవారం మహాదేవుడికి అత్యంత ప్రీతిపాత్రమైన దినం. ఈ రోజున ఉపవాస దీక్షలు ఆచరిస్తూ శివారాధన చేయడం, శివాలయాలను దర్శించుకోవడం వల్ల అనుకున్న కార్యాలు దిగ్విజయంగా పూర్తవుతాయని నమ్ముతారు.
పాటించాల్సిన ముఖ్యమైన నియమాలు..
పూజా మందిరాన్ని, పరిసరాలను ఎల్లప్పుడూ అత్యంత పరిశుభ్రంగా ఉంచుకోవాలి. శివలింగం కింద అర్ఘ్యపాత్ర అంటే జలధార బయటకు వెళ్లేలా ఉండే పీఠం. ఉత్తర దిశకు అభిముఖంగా ఉండేలా అమర్చాలి.
నిర్మాల్యం అంటే గత పూజలో సమర్పించిన పూలు, పత్రాలు ఎప్పటికప్పుడు తొలగించి శుద్ధి చేయాలి. ఇంట్లో శివలింగం ఉంటే తామసిక ఆహారాలకు దూరంగా ఉంటూ, భక్తిశ్రద్ధలతో దినచర్యను ప్రారంభించడం ఉత్తమం. మనస్ఫూర్తిగా, స్వచ్ఛమైన మనసుతో కొలిచే భక్తులకు లయకారుడైన శివుడు త్వరగానే అనుగ్రహం ప్రసాదిస్తాడని భక్తుల ప్రగాఢ విశ్వాసం.