రక్షాబంధన్ పర్వదినం అన్నాచెల్లెళ్ల అనుబంధానికి ప్రతీక. ఈ పండుగ రోజున కుటుంబంతో, తోబుట్టువులతో కలిసి దైవదర్శనం చేసుకోవడం ఈ బంధాన్ని మరింత మధురంగా మారుస్తుంది. వారణాసి, హరిద్వార్, బృందావనం, ఉజ్జయిని, అయోధ్య, వైష్ణోదేవి, తిరుపతి వంటి ప్రసిద్ధ పుణ్యక్షేత్రాల సందర్శన.. అద్భుతమైన ఆధ్యాత్మిక అనుభూతిని పంచుతాయి.
భారతీయ సంస్కృతిలో రక్షాబంధన్ అంటే రాఖీ పౌర్ణమికి ఉన్న ప్రాముఖ్యత అంతా ఇంతా కాదు. అన్నాచెల్లెళ్లు, అక్కాతమ్ముళ్ల మధ్య ఉన్న నిస్వార్థమైన ప్రేమకు, విశ్వాసానికి, రక్షణకు ఈ పండుగ ఒక అపూర్వ ప్రతీక. సాధారణంగా ఈ రోజున కుటుంబ సభ్యులంతా ఒకచోట చేరి, సంప్రదాయబద్ధంగా రాఖీ కట్టి, స్వీట్లు పంచుకుని ఆనందోత్సాహాల మధ్య గడుపుతారు.
అయితే, గత కొన్నేళ్లుగా పండుగల సమయంలో ఆధ్యాత్మిక యాత్రలు చేసే వారి సంఖ్య విపరీతంగా పెరుగుతోంది. ముఖ్యంగా రాఖీ పౌర్ణమి సందర్భంగా సోదరీమణులతో కలిసి ప్రసిద్ధ ఆలయాలను దర్శించు కుని, ఈ రోజును మరింత చిరస్మరణీయంగా మార్చుకోవడా నికి యువత ఆసక్తి చూపుతోంది.
ఈ రక్షాబంధన్కు మీరూ మీ కుటుంబంతో లేదా తోబుట్టువులతో కలిసి ఎక్కడికైనా వెళ్లాలని ప్లాన్ చేస్తున్నట్లయితే.. ఆధ్యాత్మిక యాత్ర ఒక అద్భుతమైన ఎంపిక. మన దేశంలో భక్తితో పాటు మానసిక ప్రశాంతత, అద్భుతమైన ప్రకృతి సౌందర్యం, చారిత్రక వైభవం కలబోసిన అనేక పుణ్యక్షేత్రాలున్నాయి. అటువంటి 7 ప్రముఖ ఆధ్యాత్మిక ప్రదేశాల వివరాలు మీకోసం..
1. వారణాసి..
గంగా నది ఒడ్డున ఉన్న వారణాసి భారతదేశంలోని అత్యంత పురాతనమైన, పవిత్రమైన నగరాలలో ఒకటి. ఇక్కడి ఘాట్లు, సాయంత్రం వేళ కన్నుల పండువగా జరిగే గంగా హారతి, శ్రీ కాశీ విశ్వనాథుని దర్శనం భక్తులకు అనిర్వచనీయమైన ఆధ్యాత్మిక అనుభూతిని కలిగిస్తాయి. రక్షాబంధన్ రోజున ఇక్కడ గంగా స్నానం ఆచరించి, కుటుంబ సమేతంగా స్వామివారిని దర్శించుకోవడం అద్భుతమైన అనుభవం.
2. హరిద్వార్, రిషికేష్..
ఆధ్యాత్మిక యాత్రతో పాటు అహ్లాదకరమైన ప్రకృతి సౌందర్యాన్ని ఆస్వాదించాలనుకుంటే.. ఉత్తరాఖండ్లోని హరిద్వార్, రిషికేష్ బెస్ట్ ఆప్షన్స్. హర్ కీ పౌడీ వద్ద జరిగే మహా గంగా హారతి, ఎన్నో ఏళ్ల చరిత్ర ఉన్న ప్రాచీన ఆలయాలు, ప్రశాంతమైన వాతావరణం పర్యాటకులను విశేషంగా ఆకర్షిస్తాయి. కొన్ని రోజులు పాటు ఇక్కడ గడపడం ద్వారా శారీరక, మానసిక ఒత్తిడి దూరమవుతుంది.
3. మధుర, బృందావనం..
సాక్షాత్తూ శ్రీకృష్ణ పరమాత్మ జన్మించిన మధుర, ఆయన లీలలకు సాక్ష్యంగా నిలిచిన బృందావనం రక్షాబంధన్ సమయంలో పర్యాటకులతో సందడిగా మారుతాయి. ఇక్కడి బాంకే బిహారీ ఆలయం, ఇస్కాన్ టెంపుల్, ప్రేమ్ మందిర్, ద్వారకాధీశ్ ఆలయాల్లో దర్శనంతో పాటు.. ఆ ప్రాంగణాల్లోని భక్తిపూర్వక వాతావరణం మనసుకు ఎంతో ఆనందాన్ని ఇస్తుంది. సాయంత్రం వేళ ఆలయాల్లో జరిగే సాంస్కృతిక కార్యక్రమాలు, లైటింగ్ ప్రత్యేక ఆకర్షణగా నిలుస్తాయి.
4. ఉజ్జయిని..
పరమశివుడిని ఆరాధించే భక్తులకు మధ్యప్రదేశ్లోని ఉజ్జయిని అత్యంత పవిత్రమైన ప్రదేశం. ద్వాదశ జ్యోతిర్లింగాలలో ఒకటైన మహాకాళేశ్వర జ్యోతిర్లింగాన్ని రాఖీ పౌర్ణమి రోజున దర్శించుకోవడం అత్యంత శ్రేయస్కరం. ఇక్కడి భస్మ హారతి చూడటం ప్రతి భక్తుడి కల.
5. అయోధ్య..
మర్యాదా పురుషోత్తముడైన శ్రీరాముడి జన్మభూమి అయోధ్య.. ఇప్పుడు దేశంలోనే అతిపెద్ద ఆధ్యాత్మిక కేంద్రంగా విరాజిల్లుతోంది. భవ్యమైన రామమందిర నిర్మాణం తర్వాత దేశం నలుమూలల నుంచి లక్షలాది మంది భక్తులు ఇక్కడికి తరలివస్తున్నారు. పౌరాణిక చరిత్ర, సుందరమైన సరయూ నదీ తీరం, రామయ్య దర్శనం.. ఈ యాత్రను జీవితాంతం గుర్తుండిపోయేలా చేస్తాయి.
6. వైష్ణోదేవి..
జమ్మూ కాశ్మీర్లోని త్రికూట పర్వతాలపై కొలువైన మాతా వైష్ణోదేవి యాత్ర ప్రతి ఒక్కరూ జీవితంలో ఒక్కసారైనా చేయాల్సిన యాత్ర. తోబుట్టువులతో కలిసి ట్రెక్కింగ్ చేసుకుంటూ అమ్మవారి భవనానికి చేరుకోవడం ఒక సరికొత్త అనుభవాన్ని ఇస్తుంది.
7. తిరుపతి..
కలియుగ వైకుంఠంగా పేరొందిన తిరుమల గురించి ప్రత్యేకంగా చెప్పాల్సిన అవసరం లేదు. శ్రీ వేంకటేశ్వర స్వామి దర్శనార్థం నిత్యం లక్షలాది మంది వస్తుంటారు. అన్నాచెల్లెళ్లు, కుటుంబ సభ్యులతో కలిసి ఆధ్యాత్మిక యాత్ర ప్లాన్ చేసుకునేవారికి దక్షిణ భారతదేశంలో తిరుమలకు మించిన ఉత్తమ ఎంపిక లేదు. స్వామి వారి దర్శనం తర్వాత పాపానాశనం, ఆకాశగంగ, శిల్పారామం తదితర ప్రదేశాలను కూడా సందర్శించవచ్చు. పండుగ సమయాల్లో ఈ పుణ్యక్షేత్రాలకు భక్తుల రద్దీ అధికంగా ఉంటుంది. కాబట్టి ప్రయాణానికి ముందే దర్శన టిక్కెట్లు, వసతి, వాతావరణ పరిస్థితుల గురించి పూర్తి సమాచారం తెలుసుకుని ముందస్తు బుకింగ్స్ చేసుకోవడం ఉత్తమం.