సీతా నవమి రోజున ఏమేం చేస్తే వివాహిత స్త్రీలకు శాశ్వత సుమంగళీ ప్రాప్తి కలుగుతుంది..?

ఈ ఏడాది సీతా నవమి ఏప్రిల్ 25వ తేదీన రానుంది. వైశాఖ మాసం, శుక్ల పక్ష తొమ్మిదవ తిథి.. సకల శుభాలకు నిలయం. భూదేవి పుత్రిక, అయోధ్య రాముడి ఇల్లాలు సీతా మహాసాధ్వి అవతరించిన పవిత్ర పర్వదినం 'సీతా నవమి'. జానకీ మాతను సాక్షాత్తు లక్ష్మీదేవి స్వరూపంగా శాస్త్రాలు అభివర్ణిస్తున్నాయి. ఈ పవిత్ర దినాన నియమ నిష్టలతో జానకమ్మను, శ్రీరామచంద్రుడిని ఆరాధిస్తే అఖండ సౌభాగ్యం, సంతాన ప్రాప్తి, ఆర్థికాభివృద్ధి కలుగుతాయని భక్తుల విశ్వాసం.

సీతా నవమి పర్వదినాన సూర్యోదయానికి ముందే మేల్కొనాలి. గంగాజలం కలిపిన నీటితో స్నానమాచరించి, పూజా మందిరాన్ని శుద్ధి చేసుకోవాలి. ఈ రోజున పసుపు రంగు దుస్తులు ధరించడం అత్యంత శుభప్రదంగా పరిగణించబడుతుంది. ఎందుకంటే పసుపు రంగు సౌభాగ్యానికి, మంగళానికి సంకేతం.

ఒక వేదికపై ఎర్రటి వస్త్రాన్ని పరిచి సీతారాముల విగ్రహాన్ని లేదా పటాన్ని ప్రతిష్టించాలి. తల్లికి పసుపు రంగు పుష్పాలు, సుగంధ ద్రవ్యాలను సమర్పించాలి. షోడశోపచారాలతో పూజించి, అగరబత్తీలు, నెయ్యి దీపంతో హారతి ఇవ్వాలి. జానకీ మాత నుదుటిపై ఏడుసార్లు కుంకుమను ఉంచి, ఆపై ఆ ప్రసాదాన్ని తమ నుదుట ధరించడం వల్ల వివాహిత స్త్రీలకు శాశ్వత సుమంగళీ ప్రాప్తి కలుగుతుందని నమ్మకం.

పూజా సమయంలో 'శ్రీ జానకీ రామభ్యాం నమః' అనే మంత్రాన్ని 108 సార్లు జపించాలి. సీతా చాలీసా పఠనం విశేష ఫలితాలను ఇస్తుంది.

సీతా నవమి నాడు చేసే దానాలకు ఎంతో ప్రాముఖ్యత ఉంది. పసుపు వస్త్రాలు, పసుపు రంగు పండ్లు, సుమంగళి వస్తువులను అంటే గాజులు, పసుపు, కుంకుమ దానం చేయడం వల్ల లక్ష్మీదేవి అనుగ్రహం లభిస్తుంది. అంతేకాకుండా గోధుమలు, బియ్యం వంటి ధాన్యాలను అన్నదానం చేయడం వల్ల ఇంట్లో ఎన్నటికీ అన్నపానాలకు కొరత ఉండదు.

సంధ్యా సమయంలో ఇంటి ప్రధాన ద్వారం వద్ద, తులసి కోట దగ్గర ఆవు నెయ్యితో దీపాన్ని వెలిగించాలి. దీనివల్ల ప్రతికూల శక్తులు తొలగిపోయి, సానుకూల శక్తి ప్రవాహం పెరుగుతుంది. కుటుంబంలో ప్రశాంతత, సంతోషకరమైన వాతావరణం నెలకొంటుంది. జగన్మాత సీతమ్మను స్మరిస్తూ, శ్రీరాముని సేవలో తరిస్తే జీవితం సుఖమయం అవుతుంది. 'జై సీతారాం!'.