బోడుప్పల్: మల్కాజిగిరి నగరపాలక సంస్థ బోడుప్పల్ సర్కిల్ పరిధిలోని గాయత్రి నగర్లో గల శ్రీ గాయత్రి మాత ఆలయ ప్రాంగణంలో శ్రీ రామాలయ శంకుస్థాపన కార్యక్రమం అత్యంత వైభవంగా నిర్వహించారు. గాయత్రి మాత జయంతి సందర్భంగా జరిగిన ఈ ఆధ్యాత్మిక మహోత్సవం భక్తులను విశేషంగా ఆకట్టుకుంది. మాది రెడ్డి రాజశేఖర్ రెడ్డి, మాది రెడ్డి హేమలత, సాదా ఇంద్రసేనారెడ్డి, సాదా సునీత రెడ్డి, శ్యామల శ్రీకాంత్ రెడ్డి, శ్యామల కీర్తి రెడ్డి ఆధ్వర్యంలో నిర్వహించిన ఈ కార్యక్రమంలో వేద పండితులు ప్రత్యేక పూజలు, హోమాలు, వేద మంత్రోచ్చారణల మధ్య శ్రీ రామాలయ నిర్మాణానికి శంకుస్థాపన నిర్వహించారు. ఈ సందర్భంగా గాయత్రి మాత జయంతి ఉత్సవాలను ఘనంగా జరిపి అమ్మవారికి విశేష అలంకరణలు, ప్రత్యేక అభిషేకాలు నిర్వహించారు. భక్తులు పెద్ద సంఖ్యలో తరలివచ్చి భక్తిశ్రద్ధలతో పూజల్లో పాల్గొని ఆధ్యాత్మిక ఆనందాన్ని పొందారు. ఆలయ ప్రాంగణం అంతా భగవత్ నామస్మరణలు, భజనలతో మారుమోగింది. శ్రీ రామాలయ నిర్మాణం ద్వారా ప్రాంతంలో ధార్మిక, సాంస్కృతిక కార్యక్రమాలకు మరింత ఊతం లభిస్తుందని నిర్వాహకులు తెలిపారు. కార్యక్రమానికి హాజరైన భక్తులకు తీర్థప్రసాదాలు, అన్నదానం ఏర్పాటు చేసి సేవలందించారు. ఈ సందర్భంగా భక్తులు మాట్లాడుతూ, గాయత్రి మాత ఆలయ ప్రాంగణంలో శ్రీ రామాలయ నిర్మాణం జరగడం తమకు ఎంతో ఆనందాన్ని కలిగించిందని, ఈ ఆలయం భవిష్యత్తులో ఆధ్యాత్మిక కేంద్రంగా అభివృద్ధి చెందాలని ఆకాంక్షించారు.