అపరా ఏకాదశి రోజున ఈ పొరపాట్లు అస్సలు చేయకండి..!

భారతీయ సనాతన ధర్మంలో ఏకాదశి వ్రతానికి విశేష ప్రాధాన్యత ఉంది. ముఖ్యంగా అపరా ఏకాదశి రోజున చేసే విష్ణు ఆరాధన అపారమైన పుణ్యఫలాలను ప్రసాదిస్తుందని పురాణాలు చెబుతున్నాయి. ఈ ఏడాది మే 13న రానున్న ఈ పర్వదినం వేళ.. శ్రీహరి ప్రియురాలైన తులసి మాతను ఎలా పూజించాలి? ఏ పనులు చేయకూడదు? అనే అంశంపై భక్తుల్లో అనేక సందేహాలు ఉంటాయి. వాటికి సంబంధించిన శాస్త్రోక్తమైన వివరణలు మీకోసం..

సాధారణంగా ఏకాదశి రోజున తులసికి నీరు పోయడం లేదా తాకడం నిషిద్ధం. అయితే, శాస్త్రోక్తమైన పద్ధతిలో పూజిస్తే విష్ణుమూర్తితో పాటు మహాలక్ష్మి అనుగ్రహం కూడా లభిస్తుంది.సూర్యోదయానికి ముందే నిద్రలేచి, శుచిగా స్నానమాచరించి పసుపు రంగు దుస్తులు ధరించాలి. పూజ గదిని గంగాజలంతో ప్రోక్షణం చేసి, విష్ణుమూర్తికి షోడశోపచార పూజ చేయాలి.

తులసి కోట వద్ద ఆవు నెయ్యితో దీపం వెలిగించాలి. భక్తిశ్రద్ధలతో తులసి మొక్క చుట్టూ 5, 7 లేదా 11 సార్లు ప్రదక్షిణలు చేయడం శ్రేష్ఠం.

తులసి పూజ చేసేటప్పుడు ఈ క్రింది మంత్రాలను పఠించడం వల్ల ఫలితం రెట్టింపవుతుంది:

'మహాప్రసాద జననీ, సర్వ సౌభాగ్య వర్ధినీ |
ఆధి వ్యాధి హరీ నిత్యం, తులసీ త్వం నమోస్తుతే ||'

ఓం తులసీదేవ్యై చ విద్మహే, విష్ణుప్రియాయై చ ధీమహి |
తన్నో బృందా ప్రచోదయాత్ ||

వృందా, వృందావనీ, విశ్వపూజితా వంటి అష్ట నామాలను స్మరించడం వల్ల అశ్వమేధ యాగం చేసినంత ఫలితం దక్కుతుందని ప్రతీతి.

ఏకాదశి నాడు తులసి సేవలో కొన్ని నియమాలను విస్మరించకూడదు. ఏకాదశి రోజున తులసి మాత విష్ణుమూర్తి కోసం 'నిర్జల వ్రతం' (నీరు కూడా తాగకుండా ఉపవాసం) ఉంటుందని పురాణోక్తి. అందుకే ఈ రోజున తులసికి నీరు పోయకూడదు. ఈ రోజున తులసి దళాలను కోయకూడదు. విష్ణువు నైవేద్యం కోసం ఒక రోజు ముందుగానే (దశమి నాడే) ఆకులను కోసి భద్రపరుచుకోవాలి. పూజ సమయంలో నలుపు రంగు దుస్తులను ధరించకూడదు. పసుపు లేదా తెలుపు రంగు వస్త్రాలకు ప్రాధాన్యత ఇవ్వాలి. తులసి కోట పరిసరాల్లో చెప్పులు, చెత్త ఉండకుండా చూసుకోవాలి. అపరిశుభ్రమైన చేతులతో మొక్కను తాకడం దోషంగా పరిగణించబడుతుంది. సాయంత్రం వేళ తులసి చెంత దీపం వెలిగించి 'ఓం నమో భగవతే వాసుదేవాయ' అనే మంత్రాన్ని జపించడం వల్ల ఇంట్లోని ప్రతికూల శక్తి తొలగిపోయి, ఐశ్వర్యం సిద్ధిస్తుంది.