స్తోత్ర పఠనంతో చేకూరే శుభాలు..

హిందూ సంప్రదాయంలో సోమవారానికి ఎంతో విశిష్టత ఉంది. ఈ రోజును భోళాశంకరుడికి అత్యంత ప్రీతికరమైనదిగా భక్తులు భావిస్తారు. లయకారుడైన పరమశివుడిని సోమవారం నాడు భక్తిశ్రద్ధలతో ఆరాధిస్తే.. మనసులోని కోరికలు నెరవేరడమే కాకుండా జీవితంలోని సకల కష్టాలు, దరిద్రాలు తొలగిపోతాయని విశ్వాసం. అయితే, మహదేవుని అనుగ్రహం కోసం చేసే పూజల్లో 'శివతాండవ స్తోత్రం' పఠనానికి విశేషమైన ప్రాధాన్యం ఉంది.

రావణ బ్రహ్మ స్వయంగా రచించిన ఈ స్తోత్రంతో సోమవారం నాడు స్వామివారిని అర్చిస్తే లభించే ఫలితాలు, పూజా విధానం గురించి తెలుసుకుందాం.

సోమవారం నాడు శివతాండవ స్తోత్రాన్ని పఠించే సమయంలో కొన్ని నియమాలను పాటించడం వల్ల సత్ఫలితాలు లభిస్తాయని పండితులు చెబుతున్నారు.

శుచిత్వం ముఖ్యం.. సోమవారం సూర్యోదయానికి ముందే నిద్రలేచి, తలస్నానం చేసి శుభ్రమైన వస్త్రాలను ధరించాలి. ఇంట్లోని పూజా మందిరంలో గానీ, శివాలయంలో గానీ ఉన్న శివలింగానికి గంగాజలం, స్వచ్ఛమైన పచ్చిపాలతో భక్తితో అభిషేకం చేయాలి.స్వామివారికి విభూతి లేదా చందనంతో తిలకం దిద్దాలి. శివునికి అత్యంత ప్రీతికరమైన బిల్వపత్రాలు, తెల్లటి పూలను సమర్పించాలి.

స్తోత్ర పఠనం..శివలింగం ముందు ప్రశాంతమైన మనస్సుతో ఆసీనులై, ధ్యానముద్రలో శివతాండవ స్తోత్రాన్ని స్పష్టమైన ఉచ్చారణతో పఠించాలి. స్తోత్ర పఠనం పూర్తయిన తర్వాత ఆవునెయ్యితో వెలిగించిన దీపంతో స్వామివారికి కర్పూర నీరాజనం ఇవ్వాలి. పూజా సమయంలో తెలిసీ తెలియక చేసిన తప్పులను క్షమించమని వేడుకుంటూ నమస్కరించాలి.