రావణుడు రాక్షసుడి శాపం వెనుక దాగిన పరమార్థం గురించి తెలుసా..?

రామాయణం అంటేనే చెడుపై మంచి సాధించిన విజయం.. అధర్మంపై ధర్మం పొందిన గెలుపు. లోకకంటకుడైన రావణుడిని సంహరించేందుకు సాక్షాత్తూ ఆ మహావిష్ణువే రాముడిగా అవతరించాడు. అయితే, పండితుడు, శివభక్తుడైన రావణుడు అసలు రాక్షసుడిగా ఎందుకు పుట్టాల్సి వచ్చింది..? దీని వెనుక వైకుంఠంతో ముడిపడి ఉన్న రహస్యం ఏంటి..?

శ్రీమహావిష్ణువు నివసించే వైకుంఠానికి జయ, విజయులు అనే ఇద్దరు ద్వారపాలకులు ఉండేవారు. వారు నిరంతరం స్వామి సేవలో తరిస్తూ, ఆయనకు అత్యంత ప్రియమైన భక్తులుగా ఉండేవారు. ఒకానొక సమయంలో బ్రహ్మ మానస పుత్రులైన సనకసనందనాదులు విష్ణు దర్శనం కోసం వైకుంఠానికి వస్తే.. పసిబాలుర రూపంలో ఉన్న వారిని చూసి, జయ,విజయులు లోపలికి వెళ్లకుండా అడ్డుకున్నారు. దీనిని అవమానంగా భావించిన ఋషులు.. సత్యలోక నివాసులైన మాకే అడ్డు చెబుతారా..? మీరు భూలోకంలో రాక్షసులుగా జన్మించండి' అని శపించారు.

శాపం విన్న ద్వారపాలకులు తమ తప్పు తెలుసుకుని క్షమించమని వేడుకోగా, శాపాన్ని వెనక్కి తీసుకోవడం సాధ్యం కాదని ఋషులు సెలవిచ్చారు. అయితే, సాక్షాత్తు ఆ శ్రీహరి చేతిలోనే మరణం పొందితే, త్వరగా శాపవిముక్తి కలిగి తిరిగి వైకుంఠానికి చేరుకుంటారని మార్గం చూపారు. అలా జయ, విజయులు మూడు యుగాలలో మూడు జంటలుగా జన్మించారు.

హిరణ్యాక్షుడు, హిరణ్యకశిపుడు. వీరిని వరాహ, నరసింహస్వామి అవతారాల్లో సంహరించారు.

రావణుడు, కుంభకర్ణుడు. శ్రీరామచంద్రుని చేతిలో వీరికి మోక్షం లభించింది.

శిశుపాలుడు, దంతవక్రుడు. శ్రీకృష్ణుని సుదర్శన చక్రానికి బలయ్యి మళ్లీ వైకుంఠానికి చేరుకున్నారు.

రావణుడు చేసిన ప్రతి చర్య వెనుక తన ప్రభువు దగ్గరకు చేరుకోవాలనే తపన ఉంది. శ్రీరాముని చేతిలో మరణిస్తేనే తనకు శాపవిముక్తి కలుగుతుందని ఆ పండితుడికి తెలుసు. అందుకే పైకి రాక్షసత్వాన్ని ప్రదర్శించినా, అంతర్గతంగా ఆయన రామబాణం తగలడం ద్వారానే ప్రాణాలను వదలాలని వేచి చూశాడు.

ఈ విశేషమైన కథాంశం మనకు శ్రీమద్ భాగవత పురాణంలోని ఏడవ స్కంధంలో సవివరంగా కనిపిస్తుంది. అలాగే వరాహ పురాణం, తులసీదాసు రచించిన రామచరితమానస్ లోని బాలకాండలో కూడా ఈ 'జయ విజయ' శాప వృత్తాంతం ప్రస్తావించబడింది. భగవంతుడు తన భక్తులను ఉద్ధరించడానికి, వారికి మోక్షాన్ని ప్రసాదించడానికి రకరకాల లీలను ప్రదర్శిస్తాడని పురాణాలు నిరూపిస్తున్నాయి.