చంద్రుడిని మనోకారకుడు అని ఎందుకు అంటారు..?

జ్యోతిష్య శాస్త్రం ప్రకారం చంద్రుడిని ‘మనోకారకుడు’ మనస్సుకు అధిపతి అని పిలుస్తారు. మన ఆలోచనలు, భావోద్వేగాలు, మానసిక స్థితిగతులు అన్నీ చంద్రుడి ప్రభావంతోనే ముడిపడి ఉంటాయి. ఎవరైతే తీవ్రమైన మానసిక ఒత్తిడి, ఆందోళన లేదా అశాంతితో బాధపడుతుంటారో.. వారు సోమవారం నాడు పరమశివునితో పాటు చంద్రుడిని ఆరాధించడం వల్ల అద్భుతమైన ఫలితాలు పొందవచ్చని పురాణాలు చెబుతున్నాయి.

సోమవారం అంటేనే ఆది దంపతులైన పార్వతీ పరమేశ్వరులకు అత్యంత ప్రీతికరమైన రోజు. శివుడు తన జటాజూటంలో చంద్రుడిని ధరించడం వల్ల, శివారాధన చేసే భక్తులపై చంద్రుని అనుగ్రహం త్వరగా కలుగుతుంది. జాతకంలో చంద్రుడు బలహీనంగా ఉన్నా లేదా చంద్ర దోషాలు ఉన్నా సోమవారం ఉపవాసం ఉండి శివాభిషేకం చేయడం వల్ల ఆ దోషాలు తొలగిపోతాయి. దీనివల్ల చేపట్టిన పనుల్లో విజయం సిద్ధించడమే కాకుండా, మానసిక స్థైర్యం పెరుగుతుంది.

చంద్రుడిని ప్రసన్నం చేసుకోవడానికి సోమవారం నాడు తెల్లని వస్తువులను దానం చేయడం విశేష ఫలితాలనిస్తుంది. పాలు, పెరుగు, బియ్యం లేదా తెల్లని వస్త్రాలను పేదలకు దానం చేయడం వల్ల జాతకంలో చంద్రుని బలం పెరుగుతుందని పండితులు సూచిస్తున్నారు.

పూజా సమయంలో ఈ మంత్రాలను జపించడం వల్ల మనసు నిర్మలంగా ఉంటుంది.
చంద్ర గాయత్రీ మంత్రం.. 'ఓం అమృతాంగయే విద్మహే కాలరూపాయ ధీమహి, తన్నో సోమః ప్రచోదయాత్.'
చంద్ర ధ్యాన శ్లోకం..'దధిశంఖతుషారాభం క్షీరోదార్ణవసంభవమ్ | నమామి శశినం సోమం శంభోర్ముకుటభూషణమ్ ||'
శివ మంత్రం.. 'ఓం త్రయంబకం యజామహే సుగంధిం పుష్టివర్ధనమ్ | ఉర్వారుకమివ బంధనాన్మృత్యోర్ముక్షీయ మామృతాత్ ||' సరళ మంత్రం.. 'ఓం ఐం క్లీం సోమాయ నమః' లేదా 'ఓం నమః శివాయ'. నిత్యం ఒత్తిడితో సతమతమయ్యేవారు ఈ సోమవారం నియమాలను పాటించి, భక్తితో ఈ మంత్రాలను జపిస్తే కొన్ని రోజుల్లోనే మానసిక ప్రశాంతత చేకూరుతుందని ఆధ్యాత్మిక వేత్తలు చెబుతున్నారు.