దుష్టశిక్షణ, శిష్టరక్షణ కోసమే నరసింహ అవతారం.. ఏప్రిల్ 30న స్వామివారి జయంతి..!

దుష్టశిక్షణ, శిష్టరక్షణ కోసం శ్రీమహావిష్ణువు ధరించిన అత్యంత శక్తివంతమైన అవతారం 'నరసింహ అవతారం'. హిందూ ధర్మశాస్త్రాల ప్రకారం, వైశాఖ శుద్ధ చతుర్దశి నాడే స్వామివారు హిరణ్యకశిపుడిని సంహరించి ప్రహ్లాదుడిని అనుగ్రహించారు. 2026 సంవత్సరంలో ఈ పర్వదినాన్ని ఏప్రిల్ 30, గురువారం నాడు భక్తులు భక్తిశ్రద్ధలతో జరుపుకోనున్నారు.

జ్యోతిష్య గణాంకాల ప్రకారం, చతుర్దశి తిథి వివరాలు ఇలా ఉన్నాయి:
చతుర్దశి తిథి ప్రారంభం: ఏప్రిల్ 29, సాయంత్రం 07:51 గంటలకు.
చతుర్దశి తిథి ముగింపు: ఏప్రిల్ 30, రాత్రి 09:12 గంటలకు.
నరసింహ జయంతి (ఉదయ తిథి): ఏప్రిల్ 30, 2026.

పూజకు విశేష సమయం: ఏప్రిల్ 30, సాయంత్రం 04:17 నుండి 06:56 వరకు. (నరసింహ స్వామి సంధ్యా సమయంలో ఆవిర్భవించినందున, ఈ సమయం అత్యంత ఫలప్రదం).

నరసింహ జయంతి రోజున స్వామివారిని అర్చించడం వల్ల శత్రు భయాలు తొలగి, సకల కార్యాల్లో విజయం సిద్ధిస్తుందని భక్తుల నమ్మకం.

శుద్ధి: ఉదయాన్నే అభ్యంగన స్నానమాచరించి, పూజా మందిరాన్ని గంగాజలంతో శుద్ధి చేసుకోవాలి.

ప్రతిష్ఠ: పసుపు లేదా ఎరుపు రంగు వస్త్రం పరిచిన పీఠంపై నరసింహ స్వామి విగ్రహాన్ని లేదా పటాన్ని ఉంచాలి. లక్ష్మీ నరసింహ స్వామి శాంత రూపాన్ని పూజించడం గృహస్థులకు శ్రేయస్కరం.

పూజా ద్రవ్యాలు: స్వామివారికి ఎర్రటి పుష్పాలు, గంధం, అక్షతలు మరియు తులసి దళాలతో పూజ చేయాలి.

నైవేద్యం: బెల్లం పానకం, వడపప్పు నరసింహ స్వామికి అత్యంత ప్రీతిపాత్రమైనవి. వీటితో పాటు పండ్లు, మిఠాయిలు సమర్పించవచ్చు.

మంత్ర పఠనం: పూజా సమయంలో 'ఓం నమో భగవతే నరసింహాయ' మరియు నరసింహ గాయత్రీ మంత్రాన్ని జపించడం వల్ల విశేష ఫలితం ఉంటుంది.

ఉపవాస దీక్ష:పగలు మొత్తం ఉపవాసం ఉండి, సాయంత్రం స్వామివారిని దర్శించుకున్న అనంతరం ప్రసాదాన్ని స్వీకరించి దీక్ష విరమించాలి.

పఠించాల్సిన శక్తివంతమైన మంత్రాలు
నరసింహ బీజ మంత్రం:
'ఓం ఉగ్రం వీరం మహావిష్ణుం జ్వలంతం సర్వతోముఖమ్ |
నృసింహం భీషణం భద్రం మృత్యు మృత్యుం నమామ్యహమ్ ||'

నరసింహ గాయత్రీ మంత్రం:
'ఓం ఉగ్రనృసింహాయ విద్మహే వజ్రనఖాయ ధీమహి |
తన్నో నృసింహః ప్రచోదయాత్ ||'

నరసింహ జయంతి నాడు భక్తితో పూజించే వారికి మానసిక ధైర్యం లభిస్తుంది. ముఖ్యంగా కోర్టు కేసులు, శత్రు బాధలు, రుణ విముక్తి మరియు దీర్ఘకాలిక అనారోగ్య సమస్యలతో బాధపడేవారు స్వామిని ఆశ్రయించడం వల్ల ఉపశమనం పొందుతారని పురాణాలు చెబుతున్నాయి. ప్రహ్లాదుడిని రక్షించిన విధంగానే, తనను నమ్మిన భక్తులను స్వామి ఎల్లవేళలా కాపాడతారని భక్తుల ప్రగాఢ విశ్వాసం.