జ్యేష్ఠ మాస విశిష్టత.. ఈ మాసంలో ఇలాంటి పరిహారాలు చేస్తే మీ అదృష్టం చెంతే..!

సనాతన ధర్మంలో జ్యేష్ఠ మాసానికి ఒక విశిష్టమైన స్థానం ఉంది. ఆధ్యాత్మిక పురోగతికి, దానధర్మాలకు, జపతపాలకు ఈ మాసం అత్యంత ప్రశస్తమైనది. 2026 సంవత్సరంలో మే 2వ తేదీన ప్రారంభం కానున్న ఈ పుణ్య మాసం జూన్ 29 వరకు కొనసాగుతుంది. ఈ 59 రోజుల పాటు భక్తిశ్రద్ధలతో కొన్ని ప్రత్యేక పరిహారాలు పాటించడం వల్ల జాతక దోషాలు తొలగి, అదృష్టం వరిస్తుందని పండితులు చెబుతున్నారు.

హిందూ పంచాంగం ప్రకారం.. ఇది మూడవ మాసం. పౌర్ణమి నాడు చంద్రుడు జ్యేష్ఠ నక్షత్రంలో సంచరించడం వల్ల దీనికి 'జ్యేష్ఠ మాసం' అనే పేరు వచ్చింది. ఈ మాసం కుజ గ్రహానికి అంటే అంగారకుడు అధిపతి అయినప్పటికీ, సూర్య భగవానుడి ఆరాధన ఇక్కడ కీలకం. ఎండలు తీవ్రంగా ఉండే ఈ సమయంలో నీటి వినియోగం, దానంపై ప్రత్యేక దృష్టి సారించాలని శాస్త్రాలు సూచిస్తున్నాయి.

ఈ మాసంలో సూర్య భగవానుడిని ఆరాధించడం వల్ల ఆరోగ్యం, ఐశ్వర్యం లభిస్తాయి. ముఖ్యంగా ఇలాంటి పరిహారాలు పాటించడం శుభప్రదం..

ప్రతిరోజూ 'ఓం ఘృణీః సూర్యాయ నమః' మంత్రాన్ని 108 సార్లు జపించండి. ఇది తండ్రి నుంచి లేదా పై అధికారుల నుంచి మద్దతు లభించేలా చేస్తుంది.

ఉదయాన్నే సూర్యుడికి అర్ఘ్యం అంటే జల సమర్పణ చేస్తూ గాయత్రీ మంత్రాన్ని పఠించడం వల్ల మనసు ప్రశాంతంగా ఉంటుంది. సూర్యుడికి నైవేద్యంగా పిండివంటలు లేదా పూరీలను సమర్పించి, వాటిని ప్రసాదంగా పంచడం వల్ల వ్యాపారంలో ఆటంకాలు తొలగుతాయి.

సూర్య నారాయణుడికి బెల్లం కలిపిన నీటిని సమర్పించడం వల్ల శారీరక శక్తి, ఆత్మవిశ్వాసం పెరుగుతాయి. లక్ష్మీదేవికి కుంకుమ తిలకం దిద్ది, పరమాన్నం నైవేద్యంగా సమర్పించడం వల్ల కుటుంబంలో మాధుర్యం నెలకొంటుంది.