అమెరికాలో H1B వీసా విధానంపై కొనసాగుతున్న రాజకీయ చర్చల మధ్య, అమెరికా రిపబ్లికన్ సెనేటర్ Eric Schmitt చేసిన వ్యాఖ్యలు ఇప్పుడు పెద్ద వివాదానికి దారితీశాయి. హైదరాబాద్ సమీపంలోని ప్రసిద్ధ Chilkur Balaji Temple ను ఆయన “Visa Temple”గా పేర్కొంటూ సోషల్ మీడియాలో చేసిన పోస్టులు భారతీయుల్లో ఆగ్రహాన్ని రేపాయి.
Read Also This:
ఆయుర్వేదంలో తులసిని 'మూలికల రాణి అని ఎందుకు అంటారో తెలుసా..?
సెనేటర్ ఎరిక్ ష్మిట్ తన పోస్టుల్లో H1B, L1, F1 మరియు OPT వంటి అమెరికా వీసా ప్రోగ్రామ్లు అమెరికా ఉద్యోగాలను దెబ్బతీస్తున్నాయని ఆరోపించారు. ఈ వ్యవస్థను ఆయన “Visa Cartel”గా అభివర్ణించారు. అదే సమయంలో చిల్కూరు బాలాజీ ఆలయాన్ని ప్రస్తావిస్తూ, “వీసా కార్టెల్కు హైదరాబాద్లో స్వంత వీసా టెంపుల్ ఉంది” అంటూ వ్యాఖ్యానించారు.
హైదరాబాద్లోని చిల్కూరు బాలాజీ ఆలయం చాలా కాలంగా “వీసా బాలాజీ”గా ప్రసిద్ధి చెందింది. విదేశాలకు, ముఖ్యంగా అమెరికాకు వెళ్లాలనుకునే విద్యార్థులు, ఐటీ ఉద్యోగులు ఇక్కడికి వచ్చి ప్రార్థనలు చేస్తారు. వీసా ఇంటర్వ్యూలకు ముందు లేదా వీసా వచ్చిన తర్వాత భక్తులు ఆలయాన్ని దర్శించుకోవడం ఆనవాయితీగా ఉంది.
సెనేటర్ వ్యాఖ్యలపై సోషల్ మీడియాలో తీవ్ర విమర్శలు వచ్చాయి. చాలామంది భారతీయులు “భక్తి భావంతో దేవుడిని ప్రార్థించడం తప్పు కాదు”, “దీనిని కార్టెల్తో పోల్చడం అనుచితం” అని స్పందించారు. కొందరు ఈ వ్యాఖ్యలను జాత్యహంకారంగా కూడా అభివర్ణించారు.
ఇక అమెరికాలో H1B వీసా వ్యవస్థపై గత కొంతకాలంగా రాజకీయ వాదోపవాదాలు కొనసాగుతున్నాయి. అమెరికన్ ఉద్యోగాలకు విదేశీయులు పోటీగా మారుతున్నారని కొందరు నేతలు విమర్శిస్తుండగా, మరోవైపు భారతీయ టెక్ నిపుణులు అమెరికా ఆర్థిక వ్యవస్థకు కీలకమని పలువురు నిపుణులు చెబుతున్నారు.