సాక్షాత్తు పరమశివుడినే మెప్పించిన పరమ శివభక్తుడు కన్నప్ప..

బాహ్య ఆచారాల కంటే అంతరంగ శుద్ధే దైవాన్ని చేరువ చేస్తుందని నిరూపించిన మహోన్నత గాథ... భక్త కన్నప్పది! మంత్ర తంత్రాలు తెలియకపోయినా, అమాయకమైన ప్రేమతో సాక్షాత్తు పరమశివుడినే మెప్పించిన పరమ శివభక్తుడు ఆయన.

శ్రీకాళహస్తి అడవుల్లో శివలింగాన్ని దర్శించుకున్న తిన్నన్, ఆ స్వామిని తన సర్వస్వంగా భావించాడు. చేతిలో నైవేద్యం ఉండటంతో నోటితో నది నీటిని తెచ్చి అభిషేకించేవాడు. చేతులు నిండా నైవేద్య పదార్థాలు ఉండటంతో, శివలింగంపై ఉన్న ఎండిన ఆకులను తన పాదంతోనే పక్కకు తొలగించేవాడు. లోకానికి అది అపచారంలా అనిపించినా... శివుడు మాత్రం దానిని అమాయకపు ప్రేమాభిషేకంగానే స్వీకరించాడు.

కన్నప్ప భక్తిని లోకానికి చాటడానికి శివుడు ఒక లీల సృష్టించాడు. ఒకరోజు లింగం కుడి కంటి నుండి రక్తం కారడం చూసి, కన్నప్ప ఏమాత్రం వెనుకాడకుండా తన బాణంతో తన కుడి కంటిని పెకలించి లింగంపై ఉంచాడు. కాసేపటికే ఎడమ కంటి నుండి కూడా రక్తం రావడం చూసి, తన రెండో కంటిని కూడా ఇవ్వాలని నిశ్చయించు కున్నాడు. రెండు కళ్లూ పోతే లింగం ఎక్కడుందో తెలియదని... గుర్తు కోసం తన కాలి బొటనవేలును శివలింగంపై ఉంచి, రెండో కంటిని తీసేందుకు సిద్ధమయ్యాడు.

కణ్ అప్పా!: కన్నప్ప అసమాన త్యాగానికి కరిగిపోయిన కైలాసనాథుడు జ్యోతిస్వరూపుడై ప్రత్యక్షమై... అతని చేతిని పట్టుకుని ఆపాడు. 'కణ్ అప్పా!' అంటే 'కన్నులు ఇచ్చిన తండ్రీ!' అంటూ ఆలింగనం చేసుకుని, తిరిగి చూపును ప్రసాదించాడు. భగవంతుడు ఆడంబరాలకు లొంగడు, కేవలం స్వచ్ఛమైన ప్రేమకు మాత్రమే దాసోహమంటాడని చాటిచెప్పే పవిత్ర క్షేత్రమే నేటి శ్రీకాళహస్తి!.. నమః శివాయ.. హర హర మహాదేవ... శంభో శంకర...