సత్యవ్రతుడు ‘త్రిశంకు’గా ఎలా మారాడు..? ఆ సీక్రెట్ ఏంటి..?   

పురాణాల్లో ప్రముఖంగా వినిపించే “త్రిశంకు స్వర్గం” కథ వెనుక ఒక ఆధ్యాత్మిక గాథ దాగి ఉంది. సత్యవ్రత మహారాజు ఎలా “త్రిశంకు”గా మారాడో తెలియజేసే ఈ కథలో గురుభక్తి, పాపఫలితం, తపస్సు, శాపశక్తి వంటి ఎన్నో ఆధ్యాత్మిక అంశాలు ఉన్నాయి. మంధాత మహారాజు వంశంలో జన్మించిన త్రయ్యరుణుడికి సత్యవ్రతుడు అనే కుమారుడు జన్మించాడు. అయితే చిన్నప్పటి నుంచే సత్యవ్రతుడు చెడు ప్రవర్తనతో ఉండేవాడు. ఇతరుల కుటుంబాల్లో కలహాలు రేపడం, వివాహాలను భంగం చేయడం, పరస్త్రీలపై ఆశపడటం వంటి చర్యలతో రాజ్యంలో అపకీర్తి పొందాడు. ఒక సందర్భంలో వివాహిత స్త్రీని అపహరించడంతో పాటు, ఓ యువతిని బలవంతంగా తీసుకెళ్లాడని చెబుతారు.

ఈ సంఘటనలతో తీవ్ర ఆగ్రహానికి గురైన తండ్రి త్రయ్యరుణుడు, “ఇలాంటి కుమారుడు నాకు అవసరం లేదు” అంటూ సత్యవ్రతుడిని రాజ్యం నుంచి బహిష్కరించాడు. తండ్రి ఆజ్ఞతో సత్యవ్రతుడు చండాలుల మధ్య నివసించాల్సి వచ్చింది. అదే సమయంలో రాజ్యంలో అధర్మం పెరిగిపోవడంతో ఇంద్రుడు పన్నెండేళ్ల పాటు వర్షాలను ఆపేశాడని పురాణ గాథలు చెబుతున్నాయి. ఆ కాలంలో మహర్షి విశ్వామిత్రుడు కూడా కఠోర తపస్సులో నిమగ్నమై ఉండేవాడు. కుటుంబం తీవ్ర ఆర్థిక ఇబ్బందుల్లో పడటంతో, విశ్వామిత్రుని భార్య తన కుమారుడిని అమ్మడానికి తీసుకెళ్తుండగా సత్యవ్రతుడు ఆ బాలుడిని రక్షించాడు. తరువాత విశ్వామిత్రుని కుటుంబాన్ని ఆదరిస్తూ, వారికి ఆహారం సమకూర్చి సేవ చేశాడు.

ఈ సమయంలో సత్యవ్రతుడు పన్నెండేళ్లపాటు కఠిన వ్రతం ఆచరించాలని సంకల్పించాడు. కానీ ఒకరోజు తీవ్రమైన ఆకలితో బాధపడుతూ వశిష్ఠ మహర్షికి చెందిన పవిత్ర జంతువును చంపి దాని మాంసాన్ని తిన్నాడని చెబుతారు. ఈ విషయం తెలుసుకున్న వశిష్ఠుడు తీవ్ర ఆగ్రహంతో సత్యవ్రతుడిని శపించాడు. “మొదట తండ్రికి అవమానం కలిగించావు.. రెండోది గురువు ఆస్తిని నాశనం చేశావు.. మూడోది అపవిత్రమైన మాంసం భుజించావు.. ఈ మూడు పాపాల కారణంగా నీవు ఇకపై ‘త్రిశంకు’గా ప్రసిద్ధి చెందుతావు” అని శపించినట్లు పురాణాల్లో ప్రస్తావించారు. అప్పటి నుంచి సత్యవ్రతుడు “త్రిశంకు” అనే పేరుతో ప్రసిద్ధి చెందాడు. తరువాత విశ్వామిత్రుడు తన తపస్సు శక్తితో త్రిశంకును స్వర్గానికి పంపేందుకు ప్రయత్నించగా, “త్రిశంకు స్వర్గం” అనే ప్రసిద్ధ పురాణ ఘట్టం ఆవిర్భవించిందని ఆధ్యాత్మిక గ్రంథాలు చెబుతున్నాయి.