అక్షయ తృతీయ ఈ ఏడాదిఎప్పుడు వస్తోంది..? దీని ప్రత్యేకతలేమిటి..?

సాధారణంగా ఏదైనా శుభకార్యం చేయాలంటే మంచి ముహూర్తం కోసం పంచాంగాలు చూడాలి, పండితులను సంప్రదించాలి. కానీ, ఏడాదిలో ముహూర్తంతో పనిలేకుండా ఏ శుభకార్యానికైనా తలపెట్టదగ్గ అత్యంత పవిత్రమైన రోజు 'అక్షయ తృతీయ'. ఈ ఏడాది ఈ పర్వదినం ఎప్పుడు వస్తోంది..? దీని ప్రత్యేకతలేమిటో తెలుసుకుందాం..

దృక్ పంచాంగం గణన ప్రకారం, ఈ ఏడాది వైశాఖ శుద్ధ తదియ తిథి ఏప్రిల్ 19వ తేదీన ప్రారంభమవుతోంది. తదియ ప్రారంభం..ఏప్రిల్ 19, 2026 (ఆదివారం) ఉదయం 10:49 గంటలకు. తదియ ముగియనున్నది..ఏప్రిల్ 20, 2026 (సోమవారం) ఉదయం 07:27 గంటలకు.

పండుగ తేదీ.. ఉదయ తిథి ప్రాశస్త్యం ప్రకారం, ఏప్రిల్ 19, 2026 నాడు అక్షయ తృతీయ పర్వదినాన్ని జరుపుకోవాలి.

అక్షయ తృతీయను శాస్త్రాలు 'అభూజ ముహూర్తం' స్వయంసిద్ధ ముహూర్తం,లేదా అభిజిత్ ముహూర్తం అని పిలుస్తాయి. అంటే ఈ రోజంతా పరమ పవిత్రమైనదే. వేద జ్యోతిష్యం ప్రకారం.. ఏడాదిలో ఎటువంటి దోషాలు లేని కొన్ని అరుదైన తిథుల్లో అక్షయ తృతీయ ప్రధానమైనది. ఈ రోజున వివాహాలు, గృహప్రవేశాలు, భూమి పూజలు, నూతన వ్యాపార ప్రారంభాలు లేదా వాహనాలు కొనుగోలు చేయడానికి ప్రత్యేకంగా ముహూర్తాలు చూడాల్సిన అవసరం లేదు. ఏ సమయంలోనైనా శుభకార్యాలు తలపెట్టవచ్చు.

అక్షయ తృతీయ నాడు బంగారం కొనుగోలు చేయడం వల్ల సంపద వృద్ధి చెందుతుందని భక్తుల ప్రగాఢంగా విశ్వసిస్తారు.

ఏప్రిల్ 19వ తేదీ ఉదయం 10:49 గంటల నుండి ఏప్రిల్ 20వ తేదీ తెల్లవారుజామున 06:14 గంటల వరకు స్వర్ణ లాభానికి అనుకూలమైన సమయం.

ఈ పవిత్ర దినాన చేసే జప, తప, హోమ, దాన ధర్మాలు అక్షయమైన అంటే తరిగిపోని ఫలితాలను ఇస్తాయి. అందుకే దీనిని 'అక్షయ' తృతీయ అని వ్యవహరిస్తారు. కొత్త ఆభరణాలు ధరించడం, భవిష్యత్తు కోసం మదుపు చేయడం ఈ రోజున అత్యంత శుభప్రదంగా భావిస్తారు.